Restaurering av Orre gamle kyrkje
Klepp kommunestyre har i vår løyvt pengar og gitt klarsignal til restaurering av Orre gamle kyrkje og til restaureringa av steingarden/støttemuren kring kyrkjegarden. Det er nå oppretta ei prosjektgruppe som skal sikre at alt arbeidet som skal utførast vert gjort etter krava frå Riksantikvaren og i samsvar med rapporten ”Tilstandskartlegging og restaureringsplan med kalkyle”, utarbeida av arkitektfirmaet Helge Shelderup sivilarkitekter MNAL as, Stavanger.
Prosjektet er godkjent av Riksantikvaren, og Opplysningsvesenets fond har gitt eit tilskot til istandsetting av kyrkja på kr 4,5 mill. Arbeidet som skal utførast er spesialarbeid og vil krevje antikvarisk kompetanse på svært høgt nivå. Totalkostnaden til restaureringa av kyrkja og steingarden er kalkulert til ca kr 15,5 mill inkl. mva.
Det er nå inngått avtale med grunneigar om bruk av tilliggjande areal for tilkomst og riggplass m.m. Praktiske førebuingar til prosjektoppstart vil begynne i mai månad. Arkeologisk museum i Stavanger vil som den første av fleire aktørar, starte arbeidet med antikvariske undersøkingar og konserveringsarbeid m.m. i første halvdel av juni månad. Det kan syna seg at mur-/steinveggene er så fulle av vatn at dei må stå i eit til to år for å tørke ut. Dette vil først bli klarlagt ei tid etter at restaureringsarbeidet har teke til.
Heile restauringsarbeidet vil truleg ta om lag tre år rekna frå prosjektoppstart. Så lenge som restaureringsarbeidet varer vil Orre gamle kyrkje vere stengt for publikum.
Per Gaute Liland
kyrkjeverje